پارلیمنٹ عمران خان پر آرٹیکل 6 لگانے کا فیصلہ کریگی، رانا ثناء اللہ

 وفاقی وزیر داخلہ رانا ثناء اللہ نے کہا ہے کہ یقین ہے کہ پارلیمنٹ عمران خان پر آرٹیکل 6 لگانے کا فیصلہ کرے گی۔

لاہور میں وزیر خزانہ اسحاق ڈار اور دیگر وزراء کے ہمراہ پریس کانفرنس کے دوران مریم نواز نے کہا کہ کوئی بعید نہیں کہ آنے والے دنوں میں کوئی اور بھی آڈیو آجائے، حکومت سے شکوہ ہے کہ قانون کے ہاتھ عمران خان کے گریبان تک کیوں نہیں پہنچتے؟۔

جس پر وزیر داخلہ رانا ثناء اللہ نے کہا کہ مریم نواز نے جو اعتراض اٹھایا ہے وہ بالکل درست اور جائز ہے، یہ ضرور یاد رکھیں یہ ن لیگ کی نہیں اتحادی حکومت ہے، تمام فیصلے اتحادیوں کی مشاورت سے ہوتے ہیں۔

ان کا کہنا ہے کہ کابینہ نے کل اس معاملے پر فیصلہ کیا ہے، عمران خان کو گرفتار کرنے اور مقدمات درج کرنے کی تجاویز دی گئی ہیں، اس معاملے پر پارلیمنٹ میں بھی بحث کرائی جائے گی، یقین ہے کہ پارلیمنٹ عمران خان پر آرٹیکل 6 لگانے کا فیصلہ کریگی، جس کے بعد یہ انجام کو پہنچے گا۔