پاک بھارت میچ؛ کرکٹرز ایشیا کپ کارکردگی دہرانے کے خواہاں

 لاہور: پاکستانی کرکٹرز بھارت کیخلاف ایشیاکپ کی کارکردگی دہرانے کے خواہاں ہیں۔

بھارت کیخلاف ایشیا کپ میچ میں محمد نواز نے بیٹنگ آرڈر میں ترقی پانے کے بعد 20 گیندوں پر 42 رنز بناکر پاکستان کی فتح کا سفر آسان کیا تھا، اس سے قبل انھوں نے کفایتی بولنگ کرتے ہوئے 25رنز دیکر ایک وکٹ بھی لی، آل رائونڈر میلبورن میں آج کھیلے جانے والے میچ میں بھی ایشیا کپ کی کارکردگی دہرانے کے خواہاں ہیں۔

ایک انٹرویو میں نسیم شاہ نے کہا کہ بھارت کے خلاف میچ دباؤ سے بھرپور ہوتا ہے، کوشش یہی ہے کہ اچھی پرفارمنس کا سلسلہ جاری رکھیں۔

روہت شرما، سوریا کمار یادیو اور ویراٹ کوہلی کو ٹارگٹ کرنے سے متعلق سوال پر ان کا کہنا تھا ایک فاسٹ بولر کی حیثیت سے کوشش یہی ہوتی ہے کہ وکٹ ملے لیکن میچ کی صورتحال میں ٹیم کی ضرورت کے مطابق کسی کو آؤٹ کرنا سب سے اہم ہوتا ہے، بھارت کے خلاف میچ میں یہی ہدف ہے کہ جب بھی ٹیم کو ضرورت ہو وکٹ لیکر دوں۔