اراکین قومی اسمبلی کی گرفتاری کے لیے اسپیکر سے اجازت لینے کی قرارداد متفقہ طور پر منظور کر لی گئی۔ وفاقی وزیر برائے پارلیمانی امور جاوید مرتضیٰ عباسی نے قومی اسمبلی میں کارروائی اور طریقہ کار کے قواعد میں ترامیم پیش کیں۔ ن لیگ کے رکن قومی اسمبلی برجیس طاہر نے کہا کہ جو انتخاب لڑ کر آتا اور گرفتار ہوتا ہے تو لوگ نمائندگی سے محروم ہو جاتے ہیں، یہ ترمیم بہت پہلے ہونی چاہیے تھی۔ وزیر دفاع خواجہ آصف نے قومی اسمبلی اجلاس میں اظہار خیال کرتے ہوئے کہا کہ ہم لوگوں نے قیدیں کاٹی ہیں، انتظار میں ہوتے تھےکہ پارلیمنٹ بلائے گی، حلقے کے عوام نمائندگی سے محروم ہو جاتے ہیں۔ شازیہ مری نے بھی خواجہ آصف کے مؤقف کی تائید کی جبکہ مولانا عبدالاکبر چترالی نے بھی ترامیم کی تائید کی اور کہا کہ آپ علی وزیر کے پروڈکشن آرڈر جاری نہیں کر رہے۔ خواجہ آصف کا کہنا تھا صبح چار بجے سعد رفیق کو اٹھایا جاتا تھا اور اسلام آباد لایا جاتا تھا، مجھے بھی حلف کے لیے لایا گیا میں نے کہا کہ روزانہ نہیں آ سکتا، اجلاس کے دوران پارلیمنٹ لاجز کو سب جیل قرار دیا جائے، یہ اختیار اسپیکر کے پاس ہونا چاہیے۔ قومی اسمبلی نے قواعد میں ترامیم کی منظوری دے دی، منظور کی گئی ترمیم کے مطابق رکن قومی اسمبلی کی گرفتاری کی اجازت اسپیکر سے لینا ضروری ہو گی اور قومی اسمبلی کے احاطے سے کسی رکن کو گرفتار نہیں کیا جائے گا، اس کے علاوہ گرفتار ارکان کے پروڈکشن آرڈر لازمی جاری کرنے کی ترمیم بھی منظور کی گئی۔

 وفاقی تحقیقاتی ایجنسی (ایف آئی اے ) سائبر کرائم ونگ نے فیصل آباد میں تحریک انصاف کے مقامی رہنما میاں اسلم کو گرفتار کرلیا۔

ایف آئی اے نے میاں اسلم کیخلاف عوامی اجتماع میں ن لیگی نائب صدر مریم نواز کو قتل کی دھمکی دینے کے الزام میں مقدمہ درج کرلیا۔

حکام کے مطابق ملزم میاں اسلم نے این اے 108 فیصل آباد میں ضمنی الیکشن مہم کے دوران مریم نواز کو دھمکیاں دی تھی جس کی ویڈیو وائرل ہوئی تھی۔

خیال رہے کہ 14 اکتوبر کو رہنما مسلم لیگ ن طلال چوہدری نے ٹویٹر پر ایک ویڈیو شیئر کی تھی جس میں ایک شخص عمران خان کی گرفتاری کی صورت میں مریم نواز کو جان سے مارنے کی دھمکی دی ہے۔