روسی میزائل حملے؛ امریکا کا یوکرین کو ایئرڈیفنس سسٹم فراہم کرنے کا وعدہ

 واشنگٹن/کیف: گزشتہ روز روس کے کیف سمیت 7 بڑے شہروں میں میزائل حملوں کے جواب میں امریکا نے یوکرین کو میزائل فضا میں ہی تباہ کرنے والا ایئرڈیفنس سسٹم فراہم کرنے کا وعدہ کیا ہے۔

عالمی خبر رساں ادارے کے مطابق امریکی صدر جوبائیڈن نے اپنے یوکرینی ہم منصب وولودیمیر زیلنسکی سے ٹیلی پر گفتگو کی اور جدید فضائی دفاعی نظام فراہم کرنے کا وعدہ کیا۔

امریکی صدر نے یقین دہانی کرائی کہ وہ اور ان کے اتحادی یوکرین کی ہر ممکن مدد جاری رکھیں گے اور جی 7 اجلاس میں بھی یوکرین کے ساتھ اظہار یکجہتی کی جائے گی۔

یوکرین کے صدر وولودیمیر زیلنسکی نے ایک بار پھر دوست ممالک سے جنگی ساز و سامان کی فراہمی کا مطالبہ کرتے ہوئے کہ روس کے حالیہ میزائل حملے یوکرین کو صفحہ ہستی سے مٹانے کی کوشش تھی۔

وائٹ ہاؤس سے جاری بیان میں کہا گیا ہے کہ امریکا یوکرین ایئر ڈیفنس سسٹم کے ساتھ دیگر فوجی ساز و سامان کی فراہمہ بھی جاری رکھے گا تاکہ روسی جارحیت کے خلاف یوکرین اپنا دفاع کرسکے۔

صدر جوبائیڈن نے ایئر ڈیفنس سسٹم دینے کا وعدہ اُس وقت کیا جب گزشتہ روز ہی روس نے یوکرینی دارالحکومت سمیت 7 بڑے شہروں پر میزائل حملے کیے جس کے نتیجے میں 14 افراد ہلاک اور 60 سے زائد زخمی ہوئے۔

الجزیرہ کے رپورٹر کے مطابق امریکا نے جو ایئر ڈیفنس سسٹم دینے کا وعدہ کیا ہے وہ ڈرون، میزائل کے علاوہ ہیلی کاپٹر کو مار گرانے کی صلاحیت رکھتا ہے۔

واضح رہے کہ رواں برس فروری کو روس نے یوکرین پر حملہ کرکے چار بڑے شہروں پر قبضہ کرلیا تھا اور ان شہروں میں ریفرنڈم کراکر روس کے ساتھ الحاق بھی کرلیا۔